عمران خان کو روکنا نہیں، تحفظ فراہم کرنا ہے: آئی جی اسلام آباد

اسلام آباد:(ویب ڈیسک) آئی جی اسلام آباد اکبر ناصر خان نے میڈیا سے گفتگو کرتے ہوئے کہا ہے کہ اسلام آباد میں سیکیورٹی کے فول پروف انتظامات کیے گئے ہیں، مقصد عمران خان کو روکنا نہیں، انھیں تحفظ فراہم کرنا ہے، گرفتاری کے امکانات پر بات نہیں کر سکتا،ہمیں اپنا کام کرنا ہے، لوگ تعاون کریں تاکہ کوئی ناخوشگوار واقعہ نہ ہو۔

آئی جی نے کہا ہے کہ جوڈیشل کمپلیکس میں بہترین سکیورٹی فراہم کی، ہمارا مقصد عمران خان کے قافلے کو روکنا نہیں، سہولت فراہم کرنا ہے، صرف محدود طور پر ہی راستوں کو بند کیا گیا ہے۔
قبل ازاں آئی جی اسلام آباد اکبر ناصر خان نے جوڈیشل کمپلیکس کا دورہ کیا اور پی ٹی آئی وکلا سے ملاقات بھی کی۔

صحافی نے سوال کیا کہ ”عمران خان کی گرفتاری کا امکان ہے “ جس پر آئی جی اسلام آباد نے کہا کہ میں امکانات پر بات نہیں کر سکتا۔

آئی جی اکبر ناصر نے کہا کہ پولیس اہلکاروں کو خصوصی ہدایت کی ہے کہ سکیورٹی کا خاص خیال رکھیں، ہائیکورٹ میں پولیس نے بہترین سکیورٹی دی ہے، ایسی صورتحال میں دشمن فائدہ اٹھانے کی کوشش کرتے ہیں، کوشش ہے کہ دوران سکیورٹی شہری متاثر نہ ہو۔

اکبر ناصر خان نے مزید کہا کہ اپنی طرف سے سکیورٹی کی اچھی کوشش کی، اسلام آباد میں دہشت گردی کا واقعہ کچھ ماہ پہلے ہوچکا ہے، پشاور اور کراچی میں بھی دہشت گردی کے واقعات ہوچکے ہیں، ہم نے شہر میں دفعہ 144 لگائی ہے۔

واضح رہے کہ اسلام آباد پولیس نے عمران خان کی پیشی کے باعث دفعہ 144 نافذ کی ہوئی ہے اور کچھ پی ٹی آئی کارکنان کو گرفتار بھی کیا ہے۔