سونے کی قیمت میں ہزاروں روپے کا اضافہ

کراچی: عالمی منڈی میں سونے کی عالمی قیمت میں 53 ڈالر کا اضافہ ہوا جس کے سبب پاکستان میں سونے کے قیمت ایک دفعہ پھر کئی ہزار روپے بڑھ گئی ہے ۔

بین الاقوامی مارکیٹ میں فی اونس سونے کی قیمت 53 ڈالر کے اضافے سے 1989 ڈالر کی سطح پر آنے کے باعث مقامی صرافہ مارکیٹوں میں ہفتے کو بھی فی تولہ اور فی دس گرام سونے کی قیمتوں میں بالترتیب 4100 روپے اور 3516 روپے کا اضافہ ہوگیا۔

ملک کے مختلف شہروں میں فی تولہ سونے کی قیمت بڑھ کر 2 لاکھ 8 ہزار 300 روپے اور فی 10 گرام سونے کی قیمت بڑھ کر ایک لاکھ 78 ہزار 584 روپے کی سطح پر آگئی۔

اسی طرح فی تولہ چاندی کی قیمت 100 روپے بڑھ کر 2250 روپے اور 10 گرام چاندی کی قیمت 85.73 روپے بڑھ کر 1929 روپے کی سطح پر آگئی۔