پولیس عدالتی فیصلہ ہوا میں اڑا کر عمران خان کے گھر داخل ہوئی: فواد چوہدری

لاہور: پاکستان تحریک انصاف کے رہنما فواد چوہدری کا کہنا ہے کہ لاہور ہائی کورٹ کا فیصلہ ہوا میں اڑا کر پولیس زمان پارک عمران خان کی رہائش گاہ میں داخل ہوئی۔

ایک بیان میں رہنما تحریک انصاف فواد چوہدری نے کہا کہ لاہور ہائی کورٹ کا فیصلہ ہوا میں اڑا کر پولیس عمران خان کی رہائش گاہ میں داخل ہوئی، چادر اور چار دیواری کے ہر اصول کو پامال کیا گیا، بے گناہ لوگوں کو تشدد کا نشانہ بنایا گیا، یہ تمام واقعات پاکستان میں جاری آئینی بحران کا شاخسانہ ہیں۔

فواد چوہدری کا مزید کہنا تھا کہ عدالتی احکامات ہوا میں اڑانا ناقابل معافی ہے، آج ہم نے قانونی ٹیم کی میٹنگ بلائی ہے، وہ تمام پولیس افسران جو غیرقانونی آپریشن اور تشدد میں ملوث ہوئے ان پر مقدمے درج کرا رہے ہیں۔