راولپنڈی میں دوائیں نایاب ہونے لگیں

راولپنڈی:(ویب ڈیسک) راولپنڈی میں مختلف بیماریوں کی دوائیں نایاب ہونے لگیں، روزمرہ استعمال کے میڈیکل آلات بھی غریب عوام کی پہنچ سے دور ہوگئے۔

بیماری کا علاج اور درد کی دوا کا حصول آسان نہیں کیونکہ دوائیں صرف مہنگی نہیں نایاب بھی ہوگئیں، دل کے امراض ہوں یا کوئی اور بیماری مطلوبہ دوا کے لیے شہری میڈیکل سٹورز کے چکر پر چکر لگانے لگے۔

چیئرمین پاکستان ڈرگ اینڈ کیمسٹ ایسوسی ایشن پنجاب زاہد بختاوری نے تو ادویات ہی نہیں بلکہ گلوکو میٹر اور دیگر آلات کی قیمتوں کا بھی ایسا نقشہ کھینچا کہ سن کرمریض کی تسلی ہو جائے۔

زاہد بختاوری نے کہا کہ صورتحال سنگین ہے، سی ٹی سکین اور ایم آر آئی میں جو انجیکشن استعمال ہوتے ہیں وہ بھی مارکیٹ میں دستیاب نہیں ہیں، خون پتلا کرنے والی ادویات کم ہیں جبکہ گلوکومیٹر و دیگر چیزوں کی قیمت میں 60 فیصد اضافہ ہوچکا ہے۔

مختلف امراض میں انتہائی ضروری سمجھی جانے والی دواؤں کی عدم دستیابی کسی بڑے بحران کا خدشہ ہے، ادویات کی بڑھتی قیمتوں اور قلت نے راولپنڈی کے شہریوں کو شدید مشکلات کا سامنا کرنے پر مجبور کر دیا ہے۔