سعودی خواتین فٹبال ٹیم فیفا کی درجہ بندی میں شامل
ریاض : (ویب ڈیسک ) سعودی خواتین کی فتبال قومی ٹیم نے اپنے قیام سے لیکر اب تک میچوں میں شاندار نتائج حاصل کیے ہیں اور یہ ٹیم باضابطہ طور پر فیفا کی درجہ بندی میں شامل بھی ہوگئی ہے ۔
عرب میڈیا کے مطابق سعودی خواتین کی قومی ٹیم نے فیفا کی درجہ بندی میں شمولیت اختیار کی، اپنے قیام کے دو سال سے بھی کم عرصے میں سعودی خواتین کی ٹیم شاندار نتائج حاصل کرنے میں کامیاب ہوئی ہے۔
سماجی رابطے کی ویب سائٹ ٹوئٹر پر ویمنز فٹ بال ایڈمنسٹریشن کے آفیشل اکاؤنٹ نے لکھا کہ مسلسل کامیابیاں اور لگاتار جذبہ ، 18 ماہ کی مسلسل محنت کے بعد ہمیں فخر ہے کہ ہماری خواتین کی قومی ٹیم فیفا کی درجہ بندی میں شامل ہوگئی ہے۔
24.03.23
Our journey started 18 months ago…. 🇸🇦
And today, we are proud to be officially #FIFARanked 🌍
More details: https://t.co/f69cY7TtZt 📝@FIFAcom pic.twitter.com/asUHu921sR
— إدارة الكرة النسائية – SAFF (@saff_wfd) March 24, 2023
سعودی فٹ بال ایسوسی ایشن کے صدر اور فیفا کونسل کے رکن یاسر المسحل کا کہنا ہے کہ قومی ٹیم کے کھلاڑیوں نے صرف ڈیڑھ سال میں جو کچھ حاصل کیا وہ ایک بہت بڑی کامیابی ہے، یہ ایک تاریخی لمحہ ہے، ان کا کہنا تھا کہ یہ کامیابی کھیلوں کے شعبے میں بالعموم اور فٹ بال میں بالخصوص سعودی رہنماؤں کی دلچسپی اور سرمایہ کاری کا نتیجہ ہے۔
سعودی فیڈریشن کے بورڈ آف ڈائریکٹرز کی رکن اور ویمنز فٹ بال مینجمنٹ کی جنرل سپروائزر لمیاء بنت ابراہیم بن بہیان نے کہا کہ خواتین کی قومی ٹیم نے فیفا کی درجہ بندی میں مختصر عرصے میں اور ممتاز درجہ پر داخل ہو کر تاریخ رقم کی ہے۔ انہوں نے کہا کہ قومی ٹیم کے تکنیکی اور انتظامی عملے کے شاندار کام کو سراہتے ہوئے مزید کامیابیاں حاصل کرنے کے لیے آنے والے دور میں کوششوں کو دوگنا کرنے کی اہمیت پر زور دیا۔
سعودی ویمن ٹیم کی کامیابیاں
سعودی ویمن ٹیم نےاب تک 9 میچز کھیلے ہیں ، رواں سال کے آغاز میں سعودی عرب کی میزبانی میں ہونے والے پہلے خواتین کے دوستانہ ٹورنامنٹ کا ٹائٹل بھی اپنے نام کیا، اس فتح نے بین الاقوامی درجہ بندی میں نمایاں فرق ڈالا جس کے بعد اب سعودی ٹیم فیفا اور ایشین فٹ بال کنفیڈریشن سے منظور شدہ ٹورنامنٹس میں شرکت کر سکے گی۔
