ایشیا کپ میں پاک بھارت شیڈول میچز نیوٹرل مقام پر کروانے کا امکان
لاہور: بھارت کی طرف سے پاکستان میں شیڈول ایشیا کپ 2023 میں شرکت سے انکار کے بعد بھارت کے میچز نیوٹرل مقام پر کروانے کیلئے پلان مرتب کیا جا رہا ہے اور اسی فارمولے کے تحت امکان ہے کہ قومی ٹیم ورلڈ کپ کے میچز بھارت کے بجائے نیوٹرل مقام پر کھیلے گی۔
دبئی میں ہونے والے ایشین کرکٹ کونسل کے اجلاس میں پاکستان نے ایشیا کپ میں پاکستان اور بھارت کے میچز کیلئے نیا فارمولا پیش کیا جس کے مطابق ایشیا کپ کے بھارت کے میچز کسی تیسرے ملک میں ہوں جب کہ باقی ٹیموں کے مقابلے پاکستان میں ہی ہوں۔
ذرائع کا کہنا ہے کہ اگر ایشیا کپ کے فارمولے پر عمل کیا گیا تو پاکستان بھارت میں رواں سال نومبر میں شروع ہونے والے ون ڈے ورلڈ کپ کے میچز بھی تیسرے ملک میں کھیلے گا، کیونکہ اس فارمولے پر عمل کی صورت میں پاکستان ٹیم بھی رواں برس ورلڈ کپ کے لیے بھارت نہیں جائے گی۔
پی سی بی نے آئی سی سی اور اے سی سی حکام کو اس سے متعلق آگاہ کر دیا ہے، ذرائع کے مطابق پاکستان کے ورلڈ کپ میچز کے لیے سری لنکا اور بنگلا دیش زیر غور ہیں ۔
ذرائع کا کہنا ہے کہ اس فارمولے کے تحت ایشیا کپ اور ورلڈ کپ ہی نہیں بلکہ 2025 میں پاکستان میں ہونے والی چیمپئنز ٹرافی بھی کھیلی جائےگی۔
