پاکستان کو ٹی 20 سیریز میں شکست: افغانستان نے تاریخ رقم کردی
شارجہ: افغانستان نے دوسرے ٹی 20 میچ میں بھی پاکستان کو ہرا کر تین میچوں کی سیریز 0-2 سے اپنے نام کرکے نئی تاریخ رقم کردی، افغانستان کی پاکستان کیخلاف کسی بھی انٹرنیشنل میچ میں یہ دوسری کامیابی ہے جبکہ پہلی سیریز ہے جو وہ پاکستان کیخلاف جیتنے میں کامیاب ہوا ہے۔
پاکستان کی طرف سے دیا گیا 131 رنز کا ہدف افغانستان ٹیم نے 3 وکٹوں پر حاصل کرلیا، افغانستان کے رحمان اللہ گرباز 44، ابراہیم زادران 38 رنز بناکر نمایاں رہے جبکہ نجیب اللہ زادران 23 اور محمد نبی 14 رنز بناکر ناٹ آؤٹ رہے، پاکستان کیطرف سے زمان خان اور احسان اللہ نے ایک، ایک وکٹ حاصل کی۔
دوسرے میچ میں پاکستان کے کپتان شاداب خان نے ٹاس جیت کر پہلے بیٹنگ کا فیصلہ کیا لیکن پاکستان کا ٹاپ آرڈر ایک بار پھر ریت کی دیوار ثابت ہوا، پاکستان ٹیم مقررہ 20 اوورز میں 6 وکٹوں کے نقصان پر صرف 130 رنز ہی بناسکی، افغانستان کی طرف سے فضل الحق فاروقی نے 2 جبکہ راشد خان، کریم جنت اور نوین الحق نے ایک، ایک وکٹ حاصل کی۔
قومی کرکٹ ٹیم نے دوسرے ٹی 20 میچ کیلئے محمد نواز کی جگہ فہیم اشرف کو فائنل الیون میں شامل کیا تھا جبکہ دیگر کھلاڑیوں میں کپتان شاداب خان، محمد حارث، عبداللہ شفیق، اعظم خان، فہیم اشرف، عماد وسیم، زمان خان، احسان اللہ، طیب طاہر، نسیم شاہ اور صائم ایوب شامل تھے۔
دوسری جانب مردوں کے ساتھ ساتھ خواتین شائقین بھی پاکستانی ٹیم پر برس پڑیں، بولیں قومی ٹیم نے گلی محلے کی کرکٹ سے بد تر کھیلا، نہیں کھیلنا آتا تو خواتین ٹیم سے ہی سیکھ لیں۔
سنو نیوز کے سوال پر کپتان شاداب خان کا کہنا تھا کہ ہارنے پرتنقید اورجیت پر تعریف چلتی رہتی ہے، افغانستان کے خلاف سیریز کی ہار بتا رہی ہے کہ نئے کھلاڑیوں کا تجربہ کامیاب نہ ہوسکا۔
سیریز کا تیسرا اور آخری میچ آج 27 مارچ کوشارجہ کرکٹ سٹیڈیم میں ہی کھیلا جائے گا۔
